काठमाडौं, श्रीलंकामा जारी अन्तरराष्ट्रिय प्रतियोगिता रम्बल इन द जंगलमा प्रतिस्पर्धा गर्न गएका नेपाली माउण्टेन बाइकर नारायण गोपाल महर्जनको महाबेली नदीमा खसेर मृत्यु भएको छ ।
५ स्टेजको साहसिक प्रतियोगिताकै क्रममा उनको नदीमा खसेर मृत्यु भएको स्थानीय डेलीमिरर डट एलके ले जनाएको छ ।
श्रीलंकाको कोलम्बोबाट २३० किलोमिटर दक्षिण–पूर्वमा रहेको कुदा ओया नदीमा डुबेका उनको शरीर प्रहरीले नजिकैको बाँधमा फेला पारेको थियोे । श्रीलंकन एअरलाइन्सको आयोजनामा यही जुन ९ देखि १५ तारिखसम्म चल्ने ‘रम्बल इन जंगल’ साइकल रेसमा ३३ वर्षीय महर्जनसहित अजय पण्डित क्षेत्री र बुद्धि बहादुर तामाङले पनि सहभागिता जनाएका थिए ।
श्रीलंकाको पहाडी क्षेत्रमा रहेको बर्षा वन, नदी पार गर्नुपर्ने सहासिक साइकल रेसका क्रममा खेलाडीले जंगली हात्ती, चितुवा, सर्प जस्ता जीवजन्तुको सम्भावित खतरा समेत रहेको बताइएको छ ।
प्रतियोगितामा नेपाल ,भारत, बेलायत लगायत ३९ देशका बाइकरहरुको सहभागिता रहेको छ । महर्जनको मृत्युपछि प्रतियोगिता स्थगित भएको छ ।
