काठमाडौं, इन्डियन प्रिमियर लिग (आईपीएल) बेटिङमा संलग्न भएको आरोपमा प्रहरीले पूर्व राष्ट्रिय फुटबल खेलाडी अञ्जन केसीसहित ६ जनालाई पक्राउ गरेको छ ।
मंगलबार बिहान गौरव तिवारी, दिनेश बोगटी, नरेन्द्र सुवाल, विजय श्रेष्ठलगायतलाई काठमाडौं प्रहरी परिसरबाट खटिएको टोलीले पक्राउ गरेको हो । काठमाडौं प्रहरी परिसरका प्रमुख एसएसपी विश्वराज पोखरेलले बेटिङमा संलग्न भएको आरोपमा अञ्जनसहित ६ पक्राउ परेको पुष्टि गरे ।
यसअघि म्याच फिक्सिङको आरोपमा केसीसहित ५ जना २०७२ कात्र्तिकमा पक्राउ परेका थिए । सबै जना धरौटीमा छुटेपनि मुद्दा टुंगिएको अझै टुङिगएको छैन । केसीविरुद्ध विशेष अदालतमा नेपाली फुटबलको म्याच फिक्सिङ मुद्दा विचाराधीन अवस्थामा रहेको छ । पक्राउ परेकाहरूको साथबाट जुवा खेलाउन प्रयोग भएको मोबाइल, ल्यापटप र नगद बरामद भएको छ ।
उनीहरूमाथि जुवा ऐन र ठगी अन्तरगत मुद्दा चल्ने प्रहरीले जनाएको छ । उनीहरुले अन्तराष्ट्रिय गिरोहको सहयोगमा करोडौंको बाजी समेत लगाएको प्रहरीको भनाइ छ ।
