काठमाडौं, चितवन राइनोजका खेलाडी रिजन ढकालले खेलको नियमविपरीत काम गरेको भन्दै कारबाहीमा परेका छन् ।
हिजो भएको लुम्बिनी लायन्सविरुद्धको खेलेका क्रममा रिजनले एलबीडब्लूको लागि अपिल गरेका थिए । अम्पायरले रिजनको एलबीडब्लू अपिल अस्वीकार गरेपछि रिजनले अम्पायरको निर्णयप्रति स्पष्ट असहमति व्यक्त गरे, जुन क्रिकेटको नियम विपरीत मानिन्छ ।
यही कारण म्याच रेफ्रीले उनलाई चेतावनी दिँदै एक डिमेरिट अंक प्रदान गरेका हुन् । रेफ्रीका अनुसार रिजनले आफ्नो गल्ती स्वीकार गरेका छन् ।
कीर्तिपुरस्थित त्रिवि क्रिकेट मैदानमा भएको खेलमा लुम्बिनी लायन्सले चितवन राइनोजलाई ६ विकेटले हराएको थियो । यो चितवनको पहिलो हार हो ।
उनीहरूले पहिला कर्णाली याक्सलाई ४ विकेटले पराजित गरेका थिए भने लुम्बिनीले प्रतियोगिताको पहिलो खेलमै जित निकालेको हो ।
