काठमाडौं, नेपालीका महान चार्ड दशैँ, तिहार, छठलगायतको अवसरमा मुलुकभर नै सवारी साधनहरूको रुट इजाजत खुला हुने भएको छ ।
सीमित रुट इजाजत पाएका सवारी धनीले यस वर्षको चाडपर्वमा मुलुकभर आफ्नो सवारी साधन चलाउन पाउने भएका छन् ।
यो वर्ष चाडपर्वको समयमा सवारी साधनको रुट इजाजत खुला गरिनेबारे गृहकार्य भइरहेको विभागका महानिर्देशक गोगनबहादुर हमालले बताएका छन ।
उनका अनुसार दशैँ, तिहार गरी एक महिनासम्म सवारी साधनलाई मुलुकभर रुट इजाजत खुला गरिनेछ । सरकारको यो निर्णयसँगै एउटा रुट अनुमति पाएको सवारी साधनले बिना रोकटोक र अवरोध मुलुकका जुनसुकै रुटमा चलाउन पाउने छन् ।
त्यस्तै सवारी साधनको अग्रिम टिकट बुकिङ असोज ५ देखि खुला गरिएको छ ।
विगतमा चाडपर्वका बेला सवारी साधनले यात्रुसँग निर्धारितभन्दा बढी भाडा लिने गरेको पाइए पनि यो वर्ष त्यस्तो कुनै घटना नहुने यातायात व्यवस्था विभागले डाबी गरेको छ । यदी बढी भाडा लिएको भेटिएमा यो वर्ष सोही स्थान मै कारबाही गर्ने अधिकारसहितको अनुगमन समिति बनाइएको र सम्पूर्ण जिम्मेवारी दिइएको विभागले जनाएको छ ।
विभागका अनुसार यात्रु ठग्नेलाई जरिवाना गरी लिएको बढी भाडा फिर्तासमेत गराइने छ । यातायात व्यवस्था ऐनअनुसार बढी भाडा लिने सवारी साधनलाई पाँच हजार रुपियाँसम्म जरिवाना गर्न सकिने व्यवस्था छ ।
