काठमाडौं, सुर्खेतमा शरीर जोडिएको अवस्थामा जन्मिएका जुम्ल्याहाको मृत्यु भएको छ । उनीहरु उपचारका लागि परामर्श र छलफल चलिरहेका बेला निधन भएको छ ।
मंसिर २ गते कर्णाली प्रदेश अस्पताल सुर्खेतमा शरीर जोडिएको अवस्थामा जन्मिएका जुम्ल्याहा बालिकाको शनिबार राति मृत्यु भएको हो ।
कालिकोटको रास्कोट नगरपालिका–५ सिउनाकी ललिता बुढाले ती दुई बालिकालाई जन्म दिएकी थिइन् । बालिकाहरूको तौल ३ किलो ६०० ग्राम थियो । कलेजो र मुटु जोडिएको अवस्थामा ती बालिकाको जन्म भएको थियो ।
एक्सरेपछि उनीहरूको शल्यक्रिया गर्ने अस्पतालको तयारी थियो । तर उनीहरूको शल्यक्रिया गर्न सकिने अवस्था नरहेको अस्पतालमा कार्यरत बालरोग विशेषज्ञ डा. नवराज केसीले बताए ।
‘हामीले काठमाडौंदेखि देशका विभिन्न ठाउँहरुसँगै भारतको दिल्लीसम्म बालिकाहरूको शल्यक्रियाका लागि कुरा ग¥यौं’, डा. केसीले भने, ‘तर हामीले सम्पर्क गरेका कुनै पनि ठाउँबाट शल्यक्रिया हुन नसक्ने जानकारी आयो ।’
