कञ्चनपुर बेलौरी नगरपालिका–७, वर्का सिङ्पुरमा स्थानीयले उखुबारीबाट एक ब्रुमाइज पाइथन (अजिङ्गर)को उद्धार गरेका छन् ।
सोमबार साँझ स्थानीयहरुले मध्य ब्रुमाइज पाइथन प्रजातिको अजिङ्गरलाई उखुबारीबाट उद्धार गरी सिंहपाल सामुदायिक वन क्षेत्रमा पुनः छोडेको सामुदायिक वनका अध्यक्ष पविराम थारुले जानकारी दिएका छन् ।
बेलौरी–३ का वडा सदस्य कमानसिंह चौधरीका अनुसार, उद्धार गरिएको अजिङ्गरको तौल ३५ किलो र लम्बाइ १३ फिट रहेको छ ।
अजिङ्गर आहाराको खोजीमा बस्ती नजिकको उखुबारीमा आएको हुनसक्ने आशंका गरीएको छ । वन क्षेत्रमा रहेका तालतलैया र सीमसार क्षेत्रको संरक्षण गरिएकाले अजिङ्गर र अन्य सर्पको सङ्ख्या बढ्न थालेको थारुले बताए ।
