काठमाण्डौ, काठमाडौंमा हुन गइरहेको २०१८ ‘एसिया प्यासिफिक समिटका कारण काठमाण्डौमा ४ दिन सवारी साधन आवागमन प्रभावित हुने भएको छ । अन्तराष्ट्रिय विभिन्न मुलुक र संस्थाको प्रतिनिधीत्व गर्दै विशिष्ट पाहुना आउने भएपछि सडकको प्रयोगमा कठिनाई हुने भएको हो ।
यसैलाई मध्येनजर गर्दै सरकारले ४ दिन जोर–विजोर नम्बर प्रणालीका आधारमा अरुदिनभन्दा आधा मात्रै सवारी साधन चलाउन दिने व्यवस्था गरेको छ ।
एसिया प्यासिफिक समिटका लागि काठमाडौं आउने विभिन्न राष्ट्रका राष्ट्रप्रमुख तथा विशिष्ट पाहुनाहरुको सुरक्षा र सहज आवागमनका लागि भन्दै उपत्यकाभर जोर–बिजोर प्रणाली लागू गर्ने भएको छ । मंसिर १४ देखि १७ गतेसम्म काठमाडौंमा हुन गइरहेको ‘एसिया प्यासिफिक समिटका लागि जोर–बिजोर प्रणाली लागू गरिएको हो ।
समिटमा विभिन्न १२ देशका विशिष्ट प्रतिनिधी आउनेछन् । उक्त भिआईभीहरुको सुरक्षा योजना पनि कडाई गरिएको छ । सार्वजनिक यातायात निजी साधनहरुमा जोरविजोर प्रणली लागु गरिने छ भने अत्याधीक आवश्यक सवारीसाधन स्कुल बस, हस्पिटलका बस यम्बुलेन्स, सरकारी गाडीहरुलाई लागु नहुने ट्राफिक प्रहरीको भनाई छ ।
समिटका कारण आफूहरुले भने सास्ती भोग्नुपर्ने भन्दै सर्वसाधारणले असन्तुष्टी व्यक्त गरेका छन् ।
युनिभर्सल पिस फेडेरेसनको आयोजनामा मंसिर १४ देखि १७ गतेसम्म काठमाडौंको ह्यात रिजेन्सीमा एशिया प्यासिफिक समिट हुन लागेको छ । परराष्ट्र मन्त्रालयका अनुसार बिहीबार अर्थात मंसिर १३ गते नेपालमा म्यान्मारकी नेतृ तथा नोबेल शान्ति पुरस्कार विजेता आङसाङ सुकी र कम्बोडियाका प्रधानमन्त्री हुन सेन काठमाडौं आउँदैछन् ।
