काठमाडौं, “बोक्सी”भन्दै युवतीहरुलाई यातना दिने कैलालीको घोडाघोडी नगरपालिका–५ का रामबहादुर चौधरीलाई पाँच वर्ष कैद सजाय सुनाइएको छ ।
कैलाली जिल्ला अदालतका न्यायाधीश परशुराम भट्टराईको एकल इजलासले शुक्रबार चौधरीलाई सो मुद्दामा दोषी ठहर गर्दै पाँच वर्ष कैद र एक लाख रुपैयाँ जरिवानाको फैसला गरेको हो । गत फागुन २४ गते अन्तराष्ट्रिय नारी दिवसको दिन उनले स्थानीय गाउँका राधा चौधरीलाई बोक्सी भन्दै निर्घात् कुटपिट गरेर चरम यातना दिएका थिए ।
सार्वजनिक स्थानमा युवतीहरुलाई यातना दिनका लागि सघाउने रामबहादुर उर्फ ‘भोलेबाबा’का सहयोगीहरुलाई पनि कैद सजायसहित जरिवानाको फैसाला गरेको कैलाली जिल्ला अदालतले जनाएको छ । अदालतकाअनुसार पार्वती भनिने किस्मती चौधरीविरुद्ध एक वर्ष कैद र ५० हजार रुपैयाँ जरिवानाको फैसला गरिएको छ । किस्मतीले यातना दिनका लागि रामबहादुरलाई सघाउनुका साथै आफैंले पनि कुटपिट गरेकी थिइन् ।
त्यसैगरी, रामबहादुरका अर्का सहयोगी स्मारिका चौधरीलाई ६ महिना कैद र २५ हजार रुपैयाँ जरिवाना सुनाइएको छ । उनीहरुले हेमा चौधरी र मुना चौधरीलाई पनि कुटपिट गरेका थिए ।
