काठमाडौं, झापाको अर्जनुधारा नगरपालिका ११ मा पर्ने बसपार्कस्थित खड्का फर्निचरमा आगलागी भएको छ । आगलागीबाट १२ लाख रुपैयाँ बराबरको क्षति भएको प्रहरीले जनाएको छ ।
मोती बहादुर खड्काको टिनको घेराबेरा गरिएको एक तले घरमा सञ्चालन गरिएको फर्निचर पसलमा आगलागी भएको हो । आगलागीबाट काठ चिर्ने मेसिन र काठहरु पूर्णरुपमा जलेको छ ।
प्रहरी सहायक निरीक्षक नोरजंग लामाको कमाण्डमा आगो लागेको जानकारी पाउनासाथ अस्थायी प्रहरी पोष्ट बसपार्कबाट खटिएका थिए । प्रहरी र स्थानीयले बिर्तामोड नगरपालिकाको दमकलको सहयोगमा राति करिब साढे १२ बजेतिर आगो निभाएका थिए ।
आगलागीको कारण भने खुलेको छैन तर विद्युत् सट भएर आगो लागेका अनुमान भने गरिएको छ ।
