ससुराका हत्या गरी फरार भएका ज्वाइँ रबिन पक्राउ

मोरङको पथरीशनिश्चरेमा ६० वर्षीय ससुरा चन्द्रबहादुर तामाङको हत्या गरी फरार भएका ज्वाइँ २७ वर्षीय रबिन राईलाई प्रहरीले आज धनकुटाको मूलघाटबाट पक्राउ गरेको छ । शनिबार बिहान ७ः२० बजेतिर पथरीशनिश्चरे नगरपालिका–७ स्थित मायालु चोकका तामाङको शव आफ्नै घरभित्र फेला परेको इलाका प्रहरी कार्यालय पथरीका डीएसपी मोहनविक्रम दाहालले बताए । उनका अनुसार आफ्नै घरको प्यासेजमा रगतमा डुबिरहेको अवस्थामा चन्द्रबहादुरको शव फेला परेको हो । रबिनले धारिलो हतियार प्रयोग गरी ससुराको हत्या गरेको प्रहरीले जनाएको छ । रविन ससुराली घरमा बस्दै आएका थिए । रविनको घर पनि ससुराली घर नजिकै छ । चन्द्रबहादुरकी छोरी (रविन)की पत्नी विदेशमा रहेको प्रहरीले जनाएको छ । चन्द्रबहादुरका २ छोरा, १ छोरी र पत्नी छन् । पत्नी र छोराछोरी सबै जना विदेशमा छन् । दुवै जना (ज्वाईं ससुरा) शुक्रबार राति घरमै मदिरा सेवन गरेर बसेको प्रहरीको प्रारम्भिक अनुसन्धानबाट खुलेको छ ।