यो वर्ष मनसुनको विपद्मा परी २२५ जनाले गुमाए ज्यान

पछिल्लो मनसुनको ९० दिनमा गएको वर्षको भन्दा विपद्बाट हुने मानवीय क्षतिका घटना बढेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार गएको जेठ २८ गतेदेखि यही भदौ तेस्रो हप्तासम्मको ९० दिनमा मनसुनजन्य घटनाबाट दुई सय २५ जनाको ज्यान गएको छ । यो अवधिमा ४९ जना बेपत्ता र दुई सय ८४ जना घाइते भएका छन् । प्रभावित परिवारको सङ्ख्या भने कम रहेको पाइएको छ । प्राधिकरणले ९० दिनको अवस्था प्रतिवेदन हिजो सार्वजनिक गर्दै मनसुनजन्य विपद् प्रभावित परिवार सङ्ख्या चार हजार ६ सय १५ पुगेको जानकारी गराएको छ । गएको वर्ष मनसुन शुरू भएको ९० दिनको अवधिमा ८५ जनाको ज्यान गएको, २९ जना बेपत्ता, एक सय २६ जना घाइते भएका प्राधिकरणका प्रवक्ता डा. डिजन भट्टराईले बताएका छन् । अघिल्लो वर्ष यो अवधिमा विपद् प्रभावितको परिवारको सङ्ख्या भने ६ हजार ३० रहेको थियो । यो मनसुनमा मनसुनजन्य विपद्ले सबैभन्दा धेरै बाग्मती प्रदेशमा ५७ जना र सबैभन्दा कम मधेश प्रदेशमा पाँच जनाको ज्यान गएको छ । यस वर्ष मनसुनजन्य विपद्मध्ये सबैभन्दा धेरै पहिरोबाट एक सय ३५ जना र सबैभन्दा कम ठूलो वर्षाबाट एक जनाको ज्यान गएको पनि प्राधिकरणले सार्वजनिक गरेको तथ्याङ्कमा उल्लेख छ । यस्तै बाढीबाट ४९ र चट्याङबाट ४० जनाले ज्यान गुमाएका छन् । यो ७७ वर्ष यताकै सबैभन्दा धेरै वर्षा हो ।