विराटनगर, दुई छोरीको हत्या आरोपमा आमा अस्मिता कार्कीलाई प्रहरीले नियन्त्रणमा लिएको छ । शनिबार दिउँसो मोरङको सुन्दर हरैँचा नगरपालिका–७ स्थित केरा बगान भित्र दिदीले बहिनीलाई अँगालो हालेको र टाउकोमा सल ओढाएको अवस्थामा मृत फेला परेका दुई नाबालिकाकी आमालाई प्रहरीले बुधबार बिहान झापाको बिर्तामोडबाट नियन्त्रणमा लिएको हो ।
शनिबार दिउँसो छोरीहरूको शव भेटेपछि महिलाले आत्महत्या गरेको आशंका गर्दै जंगलमा प्रहरीले अनुसन्धान चलाएका थिए । चार दिनको खोजीपछि, अस्मिता झापाको बिर्तामोडमा फेला परेकी छन् ।
उनी मानसिक रुपमा विक्षिप्त अवस्थामा भेटिएकी प्रहरीले जानकारी दिएको छ । अस्मिता बिर्तामोडमा हिडिरहेको अवस्थामा फेला परेकी छिन् । उनलाई कोशी अस्पताल विराटनगरमा लगेर उपचार थालिएको जिल्ला प्रहरी कार्यालय मोरङका प्रहरी प्रमुख एसपी नवराज कार्कीले जानकारी दिए ।
उनले प्रहरी समक्ष दुई छोरीलाई विष खुवाएर हत्या गरेको स्वीकार गरेकी छिन् । पहिला आफूले विष खाएको र पछाडि छोरीहरूलाई खुवाएको बयान दिएको जिल्ला प्रहरी कार्यालय मोरङका प्रहरी प्रमुख एसपी नवराज कार्कीले जानकारी दिएका छन् । यसबारे थप अनुसन्धान भइरहेको उनले बताए ।
श्रीमानअर्जुन र अस्मिता सुन्दरहरैँचा–७ मा भाडाको घरमा बस्दै आएका थिए । श्रीमान अर्जुनसँग विवाद भएपछि अस्मिताले नाबालिक छोरीहरू १ वर्षीया आइका र ३ वर्षीया अर्पणालाई लिएर हिँडेकी थिइन् ।
निर्माणाधीन घरमा पानी लगाउने विषयमा अर्जुन सँग पत्नी अस्मिताको विवाद भएको प्रहरीले जनाएको छ । प्रहरीका अनुसार मोबाइल कम चलाउन, छोरीहरूलाई समयमै खाना खुवाउन र घरमा पानी लगाउन भनेर श्रीमानले भनेका थिए । त्यसैको रीसमा श्रीमतीले हिडपछि श्रीमानलाई ‘तेरा छोरी मारिदिइसकें, म पनि मर्छु’ भनेर मोबाइलमा म्यासेज पठाएको प्रहरीले जनाएको छ । उनले प्रयोग गर्ने मोबाइल नाबालिकाको शव नजिकै फेला परेको थियो । अस्मिताले नै म्यासेज पठाएको हो कि होइन भनेर यकिन भने भई नसकेको प्रहरीको भनाइ छ ।
बीपीकोइराला स्वास्थ्य विज्ञान प्रतिष्ठान धरानमा पोस्टमार्टम पछि दुवै नाबालिकाको शवको अन्त्येष्टि गरि सकिएको छ । दिदीले बहिनीलाई अँगालो हालेको र टाउकोमा सल ओढाएको अवस्थामा शव फेला परेको थियो ।
