कार्तिक १०,२०७७ / ०६ : ३७ पूर्वान्ह / 2020-10-26 06:37 am
      • Salt Trading

      गुरुङको संस्कृति अवलोकनका लागि संग्रहालय निर्माण

      - १ महिना अगाडि
      असोज ३,२०७७

      दमौली, गुरुङ जातिको संस्कृति अध्ययन अवलोकन गर्नका लागि सङ्ग्रहालय निर्माण गरिएको छ । तनहुँको व्यास नगरपालिका–३ स्थित तमुसार क्होवेमा गुरुङ जातिको सङ्ग्रहालय निर्माण गरिएको हो । 

      तमु सुधार समाजले एक करोड १० लाख रुपैयाँको लागतमा सङ्ग्रहालय निर्माण गरेको समाजका अध्यक्ष मनबहादुर गुरुङले जानकारी दिए । गुरुङ जातिको रितिरिवाज, संस्कार र संस्कृति अध्ययन अवलोकन गर्नका लागि उक्त सङ्ग्रहालय उपयुक्त स्थल बन्न सक्ने गुरुङले बताए । व्यास नगरपालिका, गण्डकी प्रदेश सरकार र स्थानीय जनसहभागितामा सङ्ग्रहालय निर्माण गरिएको हो । गुरुङका अनुसार सङ्ग्रहालय निर्माणका लागि व्यास नगरपालिकाले १८ लाख र गण्डकी प्रदेश सरकारले ११ लाख रुपैयाँ सहयोग गरेको छ भने बाँकी रकम समाजकै सदस्यबाट उठाइएको छ । 

      सङ्ग्रहालय निर्माण सम्पन्न भइसकेको र सङ्ग्रहालय भित्र राखिने सामग्री संकलनमा जुटेको गुरुङले बताए । ‘गुरुङ जातिको संस्कृति झल्कने विभिन्न सामग्री राख्ने तयारी गरेका छौँ, सङ्ग्रहालयभित्र छिरेपछि जन्मेदेखि मृत्युसम्मको सबै संस्कार हेर्न पाइन्छ’, उनले भने । सङ्ग्रहालय निर्माणका लागि पूर्व लाहुरेहरुले पेन्सन रकम सहयोग गरेका छन् भने कतिपयले स्वेच्छिक रुपमा चन्दा सहयोग गरेका छन् ।  जिल्ला समन्वय समितिका सदस्य एवं प्रवक्ता गलबहादुर गुरुङ र भीमराज गुरुङले तयार गरेका गुरुङ संस्कृति झल्काउने चित्रहरु सङ्ग्रहालयका लागि हस्तान्तरण गरिएको छ ।

      गलबहादुर र भीमराजले लकडाउनको अवधिमा गुरुङ संस्कार झल्कने विभिन्न तस्वीर तयार गरेका थिए । गुरुङका अनुसार गुरुङ जातिको जन्मेदेखि मृत्युसंस्कार झल्किने १५ वटा तस्बीर सङ्ग्रहालयका लागि हस्तान्तरण गरिएको छ । उक्त तस्बीरहरु व्यास नगरपालिकाका प्रमुख बैकुण्ठ न्यौपानेले तमु सुधार समाजका अध्यध मनबहादुरलाई हस्तान्तरण गर्दै सङ्ग्रहालय अध्ययनको उपयुक्त थलो बन्ने बताए । रासस 

        सम्बन्धित समाचारहरु