काठमाडौं, नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले नेपाली भूमि लिपुलेक हुँदै मानसरोवर जाने सडक उद्घाटन गर्ने भारतीय कदम त्रिदेशीय मुद्दा भएकाले नेपाल, भारत र चीनबीच कुटनीतिक वार्ता गर्नुपर्ने बताएका छन् ।
सिंहदरबारमा आज राज्य व्यवस्था तथा सुशासन समितिको बैठकमा सहागी भएका प्रचण्डले सीमा विवाद दशकौँदेखिको समस्या भएका कारण अब सबै तथ्यको अध्ययन गरी एउटा ठोस निचोडमा पुग्नुपर्ने जनाएका छन् ।
उनले नेपाली भूमिमा चीन र भारतको सहमतिबाट व्यापारिक उद्देश्यले सडक खुलाइएको बताए । नेपाली भूमिमा हुने क्रियाकलापबाट भारतमात्र नभइ चीन पनि पछि हट्नुपर्छ र यो समस्या समाधानका लागि त्रिदेशीय वार्ता गर्नुपर्ने बताए ।
लीपुलेको विषयमा चीन र भारतबीच सम्झौता भएपछि त्रिदेशीय समस्या बन्न पुगेको औँल्याउदै उनले भने, ‘लिपुलेक प्रकरणपछि यो त्रिदेशीय बन्न पुगेको छ, यो दुई वटा देशले मात्र हल गरेर आफ्ट्यारो छ , यसमा चीन पनि संलग्न भएको छ ।’
‘लिपुलेक नेपाली भूभागको हो । सुगौली सन्धिअनुसार लिम्पियाधुरा कालीनदीको मुहान हो भनिएको छ । त्यसपूर्वको सम्पूर्ण भूभाग नेपालको हो । त्यहीअनुसार राजनीतिक र कूटनीतिकरूपमा बहस गर्नुपर्छ ‘ प्रचण्डले भने ।
विगतदेखि नै राजनीतिक र कूटनीतिकरूपमा विभिन्न चरणमा समाधानको प्रयास गरिए पनि निकास ननिस्किएका कारण हाल समस्याहरु थप जटिल बन्दै गएको उनले बताए ।
