काठमाडौं, नेपाली कांग्रेसका वरिष्ठ नेता रामचन्द्र पौडेलले पार्टीभित्रको कमजोरी हटाउन एकता गर्नुपर्ने बताएका छन् ।
काठमाडौंमा जारी महासमिति बैठकको उद्घाटन सत्रलाई सम्बोधन गर्दै वरिष्ठ नेता पौडेलले देखाउनका लागि मात्रै नभई यथार्थमै पार्टी एकता हुनुपर्ने धारणा राखेका हुन् । उपसभापति विजयकुमार गच्छदारले एकताको सन्देश दिन गरेको आह्वानप्रति लक्षित गर्दै उनले हात उठाएर मात्रै एकताबद्ध नहुने तर्क गरे । कांग्रेस अहिले धेरै ठूलो संकटमा रहेको भन्दै त्यसको सामना गर्न पार्टीभित्र एकता हुनुपर्ने उनको भनाइ छ ।
वरिष्ठ नेता पौडेलले विगतमा चुनावका लागि टिकट दिँदा गल्ती भएको भन्दै सही मूल्यांकन गरेर क्षमता र योगदानको कदर गर्नुपर्ने धारणा राखे । नेतृत्वले बीपीको बाटो नछोडेको भन्दै उनले बहुलवादमा आधारित संसदीय लोकतन्त्र, गाउमा अधिकार पुर्याउने र ग्रामीण विकास देखि मुलुकको अर्थतन्त्रमा सुधार ल्याउने लगायत काम बीपीकै चाहना अनुरुपका भएको दाबी गरे । समद्ध नेपाल सुखी नेपालीको नारा दिए पनि सरकार त्यसको बाटोमा अघि नबढेको आरोप पौडेलले लगाए ।
