काठमाण्डौ, नेपाल कम्युनिष्ट पार्टी (नेकपा)का अध्यक्ष पुष्पकमल दाहालले जातीय पहिचानको सवाल उठाउदा आफ्नो हत्याको प्रयास भएको खुलासा गरेका छन् ।
नेपाल आदिवासी जनजाती महासंघले बिहीबार काठमाडौमा आयोजना गरेको संघीयता कार्यान्वयन र जातीय पहिचानको सवाल बिषयक कार्यक्रममा मोहन बैद्य किरणको पार्टीले २०७० सालको निर्वाचनमा आफ्नो हत्या गर्न खोजेको खुलासा गरेका हुन् ।
पहिचान सहितका संघियता र संघियता सहितको संबिधान नारा बोकेर आफुहरु निर्वाचनमा गएको र त्यही बेला आफुमाथि बम प्रहार भएको उनले बताए । पहिचानको नारा बोक्दा बम नै हान्नुपर्ने कारण अझै बुझ्न नसकेको उनको भनाइ थियो ।
दाहालले नेपाली जनतामा सबैभन्दा ठूलो जागरण र ऐतिहासिक परिवर्तनको निम्ति सबैभन्दा ठूलो संघर्ष र बलिदानको नेतृत्व आफैंले गरेको दाबी गरे । १७ हजारको बलिदानमा सबै भाषाभाषी जातजातिले योगदान दिएको भन्दै उनले सबै जातजाति भाषाभाषी वर्ग समूदायको ऋण आफुमाथि रहेको बोध कायमै रहेको बताए ।
कार्यक्रममा नेकपा (क्रान्तिकारी)माओवादीका अध्यक्ष मोहन बैद्यले शासनसत्ता र राज्यसत्ता पहिचान सहितको मुद्धामा गम्भीर नदेखिएको बताए । उनले राणाशासन पञ्चायत शासन र अहिलेको शासनमा कुनै फरक नभएको टिप्पणी गरे ।
कार्यक्रममा जनजाती नेताहरुले पहिचानको मुद्धाका लागी निरन्तरको दवाव आवश्यक रहेको बताएका थिए ।
