फेसबुकमा प्रधानमन्त्री ओलीलाई ’अनफलो’ गर्ने क्रम जारी,

अहिले प्रधानमन्त्री केपी शर्मा ओलीको फेसबुक पेजलाई अनफलो गर्ने अभियान चलिरहेको छ । काठमाडौं महानगरपालिकाका मेयर बालेन शाहका समर्थकहरूले फेसबुकमा ओलीलाई अनफलो गर्ने अभियान चलाएका हुन् । मंगलबार साँझबाट सुरु भएको अभियान अहिले सम्म अझै रोकिएको छैन । ओलीको फेसबुक पेजमा मंगलबार सम्म ६ लाख ६६ हजार फलोअर्स थिए । अहिले ओलीको पेजमा फलोअर्सको संख्या ५ लाख ९३ हजारमा झरेको छ । मंगलबार बालेनको एउटा स्टाटसलाई फेसबुकले हटाइ दिएपछि बालेनका समर्थकले ओलीलाई अनफलो अनियान चलाएका थिए । आइतबार साँझ मेयर बालेन्द्र साहले नेकपा एमाले (लुम्बिनी) प्रदेश सांसद रेखाकुमारी शर्माले बालश्रम शोषण गरेको तर कारबाही नगरेको भन्ने स्टाटस राखेका थिए । सो स्टाटस मंगलबार उनको फेसबुक पेजबाट हटेको थियो । मंगलबार अपराह्न मेयर बालेनले आफ्नो स्टाटस हटाइएको दाबी सहितको पोस्ट गरेका थिए । उनले सरकारलाई चुनौती दिँदै पोस्ट उडाउने हैन, दोषी समाऊ सरकार भनेका थिए ।मेयर साहले सांसद शर्मालाई कारबाही गर्नुपर्ने माग गरिरहेका छन् । सांसद शर्मा विरुद्ध महानगरले बालबालिका सम्बन्धी कसुर र मुलुकी फौजदारी संहिता ऐन, २०७४ बमोजिम दास बनाउन नहुने कसुर अन्तर्गत जाहेरी दर्ता गरेको छ । प्रहरीले कारबाहीको प्रक्रिया अगाडि नबढाएको भन्दै मेयर साहले प्रधानमन्त्री केपी शर्मा ओलीलाई प्रश्न समेत गरेका छन् । यता एमाले निकट विद्यार्थी नेताहरूले उनको विरोध गरेका थिए । बालेनले झुटो दाबी सहित अनावश्यक प्रधानमन्त्रीलाई मुछेको उनीहरूको भनाइ थियो ।