गृहमन्त्री रमेश लेखकले सरकारको प्रमुख प्राथमिकता नागरिकलाई उत्कृष्ट सेवा प्रदान गर्नु रहेको बताएका छन् । महेन्द्रनगरस्थित नेपाल प्रहरी प्रदेश कार्यालयको नवनिर्मित भवनको आज उद्घाटन समारोहमा बोल्दै उनले प्रहरीको सुविधासम्पन्न भवनको निर्माणले नागरिकलाई सेवा प्रदानमा ठूलो सहजता ल्याउने बताए । उनले हाल प्रहरीले सीमित स्रोतसाधनमा काम गर्नुपरेको र नवनिर्मित भवनले सेवाप्रवाहलाई सहज बनाउने बताएका छन् ।
उनले नेपाल प्रहरीलाई समयानुकूल अनुसन्धानका लागि अझ प्रभावकारी बनाउनु पर्ने धारणा व्यक्त गरे । पछिल्लो समय साइबर अपराधमा वृद्धि भएकोले, प्रहरीले परम्परागत अपराधका साथै साइबर अपराधमा पनि अनुसन्धान गर्नुपर्ने बताइएको छ । उनले संसदमाा रहेका दुई ठूला दलबीच सहमति गरेर नयाँ राजनीतिक समीकरण बनाइएको पनि बताए । उनले दुई दलबीच सात बुँदे सहमति गरेर सरकार गठन भएको र ऐतिहासिक काम गरेको स्मरण गर्दै, अहिले पनि संसद्का दुई ठूला दल मिलेर देशको विशिष्ट कार्यभार सम्हाल्न एक ठाउँमा उभिएको बताएका छन् ।
उनले एमाले र कांग्रेसबीच भएको सात बुँदे सहमति कार्यान्वयनमा कुनै शंका नगर्नसमेत आग्रह गरे ।
उक्त समारोहमा नेपाल प्रहरीका महानिरीक्षक वसन्तबहादुर कुँवरले सम्पूर्ण नागरिकलाई गुणस्तरीय सेवा प्रदान गर्न पूर्वाधार विकासमा जोड दिएको बताए ।
उन्होले नवनिर्मित भवनले प्रदेश प्रहरीको अनुगमन र सुपरिवेक्षणमा ठूलो सहयोग पुर्याउने विश्वास व्यक्त गरे । उक्त भवन निर्माणका लागि २०७९ सालको मंसिर २९ गते आशिस कन्ट्रक्सनसँग रु १३ करोड २६ लाखमा ठेक्का सम्झौता गरिएको थियो ।
