रास्वपाको पाँच दिनको सार्वजनिक यातायात यात्रा:सांसदको अनुभव लिने नयाँ कदम

काठमाडौं । राष्ट्रिय स्वतन्त्र पार्टी (रास्वपा)ले आफ्नो पार्टीका केन्द्रीय सदस्य र सांसदहरुलाई पाँच दिन सार्वजनिक यातायातका साधन प्रयोग गर्न सुझाएको छ । सार्वजनिक यातायातको क्षेत्र सुधारका लागि संसदमा सार्वजनिक महत्वको प्रस्ताव दर्ता गराउने तयारी गरिरहेको भन्दै पार्टी सभापति रवि लामिछानेको प्रस्ताव अनुसार केन्द्रीय सदस्य र सांसदहरूले सार्वजनिक यातायातको वर्तमान अवस्था नजिकबाट बुझ्ने र अनुभव गर्ने प्रक्रिया स्वरूप पाँच दिन आफ्नो निजी सवारी साधनको साटो सार्वजनिक यातायातको प्रयोग गर्ने प्रस्ताव गरिएको रास्वपाका कार्यवाहक प्रवक्ता मनिष झाले बताएका छन् । उनले आपत्कालीन अवस्था, स्वास्थ्यको कारण वा अन्य कुनै पनि किसिमको अप्ठ्यारोमा परेकाहरुका लागि भने सार्वजनिक यातायातका साधन प्रयोग, बाध्यकारी नभएको बताए । सार्वजनिक यातायात सुधारका लागि आवश्यक नीति बनाउन पहिला समस्याको पहिचान गर्नुपर्ने भन्दै रास्वपा नेताहरूले यो अभियान चलाएका हुन् । उनले नेपालमा सार्वजनिक यातायातमा धेरै सुधारको आवश्यकता भएको र राष्ट्रिय स्वतन्त्र पार्टीले त्यसमा सुधार ल्याउनको लागि एउटा खाका कोरेर स्पष्ट योजना सहित संघिय सदनमा सार्वजनिक महत्वको प्रस्ताव तयार गरिरहेको बताएका छन् । तर, प्रस्तावित कानुनको तयारी गर्ने क्रममा कानुन बनाउने प्रक्रियामा आबद्ध जनप्रतिनिधिहरूले त्यसको यथार्थ अनुभव गर्न आवश्यक हुने उनको धारणा छ ।