चारदिने भारत भ्रमणमा रहेका प्रधानमन्त्री पुष्पकमल दाहाल ‘प्रचण्ड’ शुक्रबार (आज) इन्दोर जाँदैछन् । प्रचण्ड आज दिउँसो १ बजे इन्दोर पुग्नेछन्। उनी आज राति त्यहीँ बस्ने कार्यतालिका रहेको छ ।
त्यस्तै आजै प्रधानमन्त्री प्रचण्डले मध्यप्रदेशका राज्यपाल मंगुभाइ पटेलसँग भेटघाट गर्नेछन्। साँझ मुख्यमन्त्री शिवराजसिंह चौहानले आयोजना गर्ने रात्रिभोजमा सरिक हुनेछन्। मध्यप्रदेशको इन्दोर फोहोर व्यवस्थापनको नमूनायोग्य सहर हो । सफा र व्यवस्थित पनि छ ।
प्रधानमन्त्री प्रचण्डले त्यहाँको फोहोर व्यवस्थापनको अवलोकन गर्ने उनको सचिवालयले जानकारी दिएको छ ।
प्रचण्ड शनिबार अपराह्न स्वदेश फर्कने कार्यतालिका छ ।
