काठमाडौँ । देशमा हाल न्यूनचापीय प्रणालीको प्रभाव कायम रहेको जल तथा मौसम विज्ञान विभागले जनाएको छ।
मौसम पूर्वानुमान महाशाखाका अनुसार आज दिउँसो उच्च पहाडी तथा हिमाली भूभागमा सामान्यतया बादल लाग्ने छ भने देशका बाँकी क्षेत्रमा आंशिक बदली रहनेछ।
विशेषगरी कोशी, गण्डकी र कर्णाली प्रदेशका उच्च पहाडी तथा हिमाली क्षेत्रका केही स्थानमा, साथै अन्य उच्च पहाडी तथा हिमाली भेगका एक–दुई स्थानमा हल्का हिमपात र वर्षा हुन सक्ने सम्भावना रहेको छ।
यसैबीच, पूर्वी तथा मध्य तराईका केही स्थानमा बिहानपख हुस्सु लाग्ने अनुमान गरिएको छ।
त्यसैगरी आज राति सुदूरपश्चिम प्रदेशसहित पहाडी र हिमाली भूभागमा आंशिक बदली रहनेछ भने बाँकी क्षेत्रमा मौसम प्रायः सफा रहने महाशाखाले जनाएको छ।
रातिको समयमा पनि कोशी र गण्डकी प्रदेशका उच्च पहाडी तथा हिमाली क्षेत्रका एक–दुई स्थानमा हल्का हिमपात र वर्षाको सम्भावना कायमै रहेको जनाइएको छ।
