मोरङ, महिला उद्यमी संघ मोरङको ९औँ वार्षिक साधारण सभा सम्पन्न भएको छ । साधारण सभामा मोरङका महिला उद्यमीहरूको उद्यमिक यात्राको समीक्षा गर्दै हालसम्म हासिल गरेका उपलब्धिहरू साझा गरियो भने संस्थामा उल्लेखनीय योगदान पु¥याएका उद्यमीहरूलाई सम्मान गरिएको छ ।
सभामा आगामी दिनमा सञ्चालन गरिने कार्यक्रम तथा कार्ययोजनाबारे छलफल गरिएको थियो । सदस्यहरूको सक्रिय सहभागितासहित सम्पन्न उक्त कार्यक्रममा एकता, नेतृत्व र महिला उद्यमशीलतालाई अझ सुदृढ बनाउने प्रतिबद्धता व्यक्त गरिएको छ ।
कार्यक्रमलाई सम्बोधन गर्दै संघकी अध्यक्ष कृति श्रेष्ठ उपाध्यायले महिला उद्यमशीलता क्षेत्रलाई थप सशक्त बनाउनु आजको आवश्यकता भएको उल्लेख गरिन् । उनले महिलाहरूलाई उद्यममा सक्रिय, आत्मनिर्भर र प्रतिस्पर्धी बनाउन संघ निरन्तर क्रियाशील रहने बताइन् । सो अवसरमा उद्यम क्षेत्रमा सक्रिय र प्रेरणादायी महिला उद्यमीलाई विशेष सम्मान प्रदान गरिएको थियो ।
महिला उद्यमी संघ मोरङले उद्यमीहरूलाई प्रत्यक्ष फाइदा पुग्ने तथा नयाँ स्टार्टअपलाई हौसला दिने उद्देश्यसहित विभिन्न तालिम, सहजीकरण तथा प्रवद्र्धनात्मक गतिविधिहरू सञ्चालन गर्दै आएको छ । साथै महिला उद्यमीहरूले उत्पादन गरेका वस्तुहरूको प्रवद्र्धन र बजार विस्तार गर्ने उद्देश्यले विराटनगरमा ग्ग्यालरी संञचालनमा ल्याएको छ भने समय–समयमा मेला तथा प्रदर्शनीसमेत आयोजना गर्दै आएको छ ।
यसैबीच, महिला उद्यमी संघ मोरङको २२औँ वार्षिक साधारण सभाको अवसरमा विन मोरङ च्याप्टरले ७७ जिल्ला च्याप्टरमध्ये प्रथम स्थान हासिल गर्दै उत्कृष्ट जिल्ला च्याप्टरको रूपमा सम्मान प्राप्त गर्न सफल भएको थियो । यस उपलब्धिले मोरङ जिल्लामा महिला उद्यमशीलतामा नयाँ ऊर्जा र प्रेरणा थपेको छ भने अन्य जिल्ला च्याप्टरहरूका लागि पनि प्रेरणाको स्रोत बनेको आयोजकले बताएका छन् ।
कार्यक्रमको समापनसँगै सहभागीहरूले महिला उद्यमशीलताको विकासका लागि सहकार्य, नवप्रवर्तन र निरन्तर सक्रियताको आवश्यकता औंल्याउँदै आगामी दिनमा अझ प्रभावकारी कार्यक्रम सञ्चालन गर्ने प्रतिबद्धता व्यक्त गरेका छन् ।
