विराटनगर, भाद्र २४ गते जेनजी आन्दोलनका क्रममा विराटनगरस्थित सरकारी कार्यालयमा भएको तोडफोड र आगजनी घटनामा संलग्न भएको ५ जना लाइ प्रहरीले पक्राउ गरेको छ । पक्राउ पर्नेमा पूर्वमन्त्री एवं नेकपा माओवादीका नेता अमनलाल मोदीका स्वकीय सचिव ताजिम अन्सारी पनि पक्राउ परेका छन् ।
अन्सारीसँगै नेपाली कांग्रेस र नेकपा एमाले निकट स्थानीय कार्यकर्ता पनि पक्राउ परेका हुन् । उनीहरू माथि मोरङ जिल्ला अदालतसहितका सरकारी कार्यालयमा आगजनी र तोडफोडमा आबद्ध भएको आरोप छ ।
अन्सारी घटना भइरहँदा तत्कालीन माओवादी केन्द्र (हाल नेकपा)का सांसद अमनलाल मोदीका स्वकीय सचिव थिए । घटनास्थलका सार्वजनिक भिडियोमा आगजनी गर्दा उनको प्रत्यक्ष उपस्थिति देखिएको प्रहरीले जनाएको छ ।
उनीहरूविरुद्ध आपराधिक उपद्रवसम्बन्धी मुद्दा दर्ता गर्ने तयारी भइरहेको छ ।
यसअघि प्रहरीले मोरङका विभिन्न स्थानबाट २३ जनालाई पक्राउ गरेको थियो ।
