काठमाण्डौ – प्रधानमन्त्री केपी शर्मा ओलीले सरकारले बाढी पहिरोका घटनापछि उद्धार र राहतको कामलाई सक्दो तीव्रता दिएको बताएका छन् ।
अमेरिकाबाट फर्किएपछि आज त्रिभुवन अन्तर्राष्ट्रिय विमानस्थलमा पत्रकारहरूसँग कुराकानी गर्दै प्रधानमन्त्री ओलीले सरकारले उद्धार र राहतमा राम्रो काम गरेको बताए । ओलीले सरकारले क्षमताअनुसारको उद्धार र राहतका कार्यक्रम गरिरहेको बताए । उनले विरोधका लागि विरोध गर्नुको औचित्य नभएको बताएका छन् ।
मौसम विज्ञान विभागले एक हप्ताअघि अति ठूलो वर्षको नै पूर्वसूचना दिएको र तीन दिनअघि ’रेड अलर्ट’ जारी गरेको अवस्थामा पनि सरकारले पूर्वतयारी किन गर्न सकेन त ? भन्ने पत्रकारको प्रश्नमा ओलीले कहाँ कहाँ पहिरो जान्छ भनेर सरकारलाई थाहा नहुने र थाहा हुने कुरा पनि नभएको अनि काठमाण्डौमा यति धेरै डुबान हुन्छ भन्ने पनि आँकलन नभएको बताए । विपद्पछि भने सरकारले सक्दो काम गरिरहेको उनले बताए ।
