काठमाडौं, सरकारले काठमाडौँ उपत्यकाभित्र प्रवेश गर्ने मुख्य नाका साँगा र थानकोटमा पीसीआर चेकजाँच सुरु गरेसँगै मुख्य प्रशासनिक केन्द्र सिंहदरबारमा समेत परीक्षण सुरु गरेको छ ।
पछिल्ला दिनहरूमा काठमाडौँमा कोरोना सङ्क्रमितको सङ्ख्या बढिरहँदा सरकारले मुख्य प्रशासनिक केन्द्र सिंहदरबारमा समेत पीसीआर परीक्षणका लागि थ्रोट स्वाब सङ्कलन गरेको हो । काठमाडौंमा भाइरस फैलिएपछि सिंहदरबारभित्रका कर्मचारीको नमूना स्वाब संकलन गरी बुधबारदेखि पिसिआर परीक्षण सुरू गरिएको हो ।
काठमाडौं उपत्यकाभित्र मंगलबार ५३ जनामा कोरोना पोजेटिभ देखिएको थियो । तीमध्ये २३ जना प्रहरी रहेका छन् । विभिन्न मन्त्रालयमा कार्यरत कर्मचारी, सुरक्षाकर्मी, सवारी चालक र बाहिरी मान्छेको सम्पर्कमा रहने करिब सात सय कर्मचारीको स्वाब संकलन गरी पिसिआर परीक्षण गर्न लागिएको प्रधानमन्त्री तथा मन्त्रिपरिषद कार्यालयका सचिव महेन्द्रप्रसाद गुरागाईंले जानकारी दिएका छन् ।
