कार्तिक २८,२०७६ / १० : ४४ पूर्वान्ह / 2019-11-14 10:44 am

        आँखाको मूल्य

        - ३ हप्ता अगाडि
        असार २,२०७६

        म घर छोडेको अन्तिम दिन,

        बाको एउटा आँखाबाट तप्प खस्यो,

        एक थोपा भोको निराशा !

        र अर्को आँखाको परेलिमा झुन्डिइरह्यो भोलिको भातको भरोसा!

        म घर छोडेको अन्तिम दिन!

        आमाको एउटा आँखाबाट

        खस्यो एक थोपा प्रेम !

        अछेता मुछिरहेको थालिमा !

        र अर्को आँखा तेर्सियो म आएको बाटोमा! चामल बोकेर फर्किने आशाले!

        म घर छोडेको अन्तिम दिन !

        दैलोमा भाउजुले 

        दाइ नफर्केको कुरा सम्झेर

        एक थोपा दाइ खसालिन् एउटा आँखाबाट!

        र अर्को आँखाको डिलमा 

        टिलपिल टिलपिर बनाएर अड्याइन् 

        मेरी श्रीमती को सिउँदो!

        म घर छोडेको अन्तिम दिन!

        सानी बहिनीले ले खसालिन् एउटा आँखाबाट फाटेको जामा!

        र अर्को आँखामा फुलाइन् तिहारका मखमली फुल!

        म घर छोडेको अन्तिम दिन!

        हजुरबा ले एउटा आँखाबाट खसाले आफ्नो प्यारलाइसेस रोग!

        र अर्को आँखामा टल्काइरहेथे ,

        बज्यैको अर्बुदलाई धपाउने आशाको दीप!

        म घर छोडेको अन्तिम दिन !

        बज्यैको एउटा आँखामा टल्किरहेथ्यो बिदाइको बेला कापिरहेका हातका आकृती,

        र अर्को आँखाको आँसुमा देखिएथ्यो,

        मैले चयनको निद्रा बोकेर ल्याउने समयमा

        सधै सधैका लागि आफू निदाउने त्रास !

        म परिवारको त्यस्तो आँखा हुँ

        जस्ले हेर्ने प्रतीक्षा गरिरहेछ एउटा खुसी !

        यसकारण डाक्टर साब!

        मेरा आँखाहरु बेचिदिनिहोस्!

        जस्ले बचाउन सकोस् मेरो परिवारको दृश्टि !

          सम्बन्धित समाचारहरु