काठमाडौं, बंगलादेशको राजधानी ढाकाको मिर्पुर क्षेत्रमा रहेको एक गार्मेन्ट कारखानामा भीषण आगलागी हुँदा कम्तीमा १६ जनाको मृत्यु भएको छ । अधिकारीहरूले मृतक संख्या अझै बढ्न सक्ने चेतावनी दिएका छन् ।
बंगलादेशको अधिकारीहरूका अनुसार अहिले सम्म फेला परेका १६ शवहरू अत्यधिक जलेका कारण पहिचान गर्न कठिन भएको छ । आगलागी मंगलबार दिउँसो करिब मध्याह्नतिर सुरु भएको थियो र तीन घण्टापछि नियन्त्रणमा आएको बताइएको छ । तर कारखानासँगै रहेको रासायनिक गोदाममा आगो अझै बलिरहेको छ ।
अधिकारीहरूले कुन भवनमा पहिले आगो लागेको हो भन्ने पत्ता लगाउन सकेका छैनन् । प्रत्यक्षदर्शीहरूले भने रासायनिक गोदाममा ब्लीचिङ पाउडर, प्लास्टिक र हाइड्रोजन पेरोक्साइडजस्ता पदार्थहरू रहेको बताएका छन्, जसले आगो अझ फैलिन र तीव्र हुन मद्दत गरेको अनुमान गरिएको छ ।
घटनापछि आफन्तहरू घटनास्थल वरिपरि भेला भई हराइरहेका परिवारका सदस्यहरूको खोजीमा छन् ।
बंगलादेशमा कमजोर सुरक्षास्तर र पूर्वाधारका कारण यस्ता आगलागीका घटनाहरू बारम्बार हुने गर्द छ ।
