जिम्बाब्वेको आपत्कालीन निर्णय:७ करोड मानिसको भोक मेटाउन २०० हात्तीको बलि

चालीस वर्ष यताकै चरम भोकमरी देखापरेपछि जिम्बाब्वेमा २०० हात्ती मारेर मासु बाँडिने भएको छ । यहाँका ७ करोड मानिस खाद्य संकटमा परेपछि सरकारले त्यस्तो निर्णय गरेको हो । भोकमरीसँग जुध्न सरकारले हात्ती मार्ने आदेश दिएको रोयटर्स समाचार एजेन्सीले जनाएको छ । एजेन्सीका अनुसार, जिम्बाब्वेका ४ जिल्लामा २०० हात्ती मारेर त्यसको मासु विभिन्न समुदायमा बाँडिनेछ । जिम्बाब्वे पार्क एण्ड वाइल्डलाइफ अथोरिटीले यो कुराको पुष्टि गरेको छ । जिम्बाब्वे पछिल्लो ४ दशकमा सबैभन्दा ठूलो खडेरीको समस्यासँग जुधिरहेको छ । यस्तो अवस्थामा जिम्बाब्वेका ६ करोड ८० लाखभन्दा बढी मानिस खाद्य अभावसँग जुधिरहेका छन् । त्यहाँ कृषि उत्पादन चौपट भएको छ र खाद्यान्नको अभावमा भोकमरी चरम बनिरहेको छ । मानिसहरुसँग खानका लागि केही पनि बाँकी छैन । यस्ता अवस्थामा खडेरीका कारण फैलिरहेको भोकमरीको समस्या समाधानका लागि जिम्बाबे सरकारले एउटा कठोर निर्णय लिएको हो । पछिल्लो समयमा अफ्रिकी मुलुकहरुमा अल निनो नामक महासागरीय उपक्रमका कारण लामो खडेरी परिरहेको छ । जिम्बाबेको राष्ट्रिय निकुञ्ज तथा वन्यजन्तु व्यवस्थापन विभागका प्रवक्ता तिनाशे फारावोले मासुका लागि २ सय जंगली हात्तीलाई मार्न लागिएको पुष्टि गरेका छन् । उनका अनुसार हात्ती मार्ने काम देशभर नै हुनेछ । सो कामलाई कसरी गर्ने भन्ने विषयमा अध्ययन भईरहेको उनले बताएका छन् । खाद्यान्नको अभाव झेलिरहेका समुदायलाई हात्तीको सिकार गर्नका लागि अनुमति जारी गरिने र सरकारी निकाय स्वयंले पनि हात्ती मारेर मासु वितरण गर्ने उनले बताए । त्यसरी मारिएका हात्तीको मासु ती समुदायलाई प्रदान गरिनेछ जहाँ खडेरीको मार सबैभन्दा धेरै छ र मानिसहरु खानाको अभावमा समस्यामा परेका छन् । जिम्बाबेमा हात्तीको हत्या गर्ने आधिकारिक सिलसिला सन् १९८८ बाट सुरु भएको थियो । खासगरी त्यहाँका ह्वांगे, मबिरे, शोलोशो र चिरेजी जिल्लामा हात्ती मार्ने गरिएको थियो । एनका अनुसार प्राकृतिक वातावरणले धान्नै नसक्ने गरी हात्तीको संख्या बढेको क्षेत्रबाट हात्ती सिकार गरिनेछ । जसमा सुख्खाग्रस्त ह्वांगे राष्ट्रिय निकुञ्ज पहिलो प्राथमिकतामा पर्नेछ । बढ्दो तापमानसँगै पानीका श्रोतको क्षयीकरणले गर्दा त्यहाँ मानिस र वन्यजन्तुबीच द्वन्द बढ्दै गएको छ । उक्त राष्ट्रिय निकुञ्जले १५ हजार मात्रै हात्ती धान्न सक्ने भएपनि हाल त्यहाँ हात्तीको संख्या ४५ हजार भन्दा धेरै छ । पानीको अभावले गर्दा गत डिसेम्बरमा उक्त निकुञ्जमा एक सयभन्दा धेरै हात्ती मरेका थिए ।