ग्रीसको जंगलमा लागेको आगो राजधानी एथेन्सतर्फ तीव्र गतिमा फैलिन थालेको छ । गत आइतवारदेखि सुरु भएको आगोको कारण जोखिममा रहेका हजारौं नागरिकलाई सुरक्षित स्थानमा सारिएको बीबीसीले जनाएको छ । आगलागीको कारण एथेन्समा वायु प्रदूषण र तापमानमा वृद्धि भएको देखिएको छ । हावाको तीव्रतासँगै आगो ३० किलोमिटरको दूरीसम्म फैलिएको र बस्तीका क्षेत्रमा पुगेको छ ।
एथेन्सबाट २० किलोमिटर उत्तर पूर्वमा पर्ने वरनाभासमा धेरै घरमा आगलागी भएको छ । सम्भावित क्षतिलाई मध्यनजर गरेर यस क्षेत्रमा बालबालिका र सेनाका अस्पताल खाली गराइएको छ । आगो निभाउन छ सय ७० वटा दमकल परिचालन गरिएको छ ।
सरकारले अन्तर्राष्ट्रिय सहयोगको लागि आह्वान गरेपछि फ्रान्स, इटाली, चेक गणतन्त्र र रोमानियाले आगो निभाउनका लागि विमान पठाएका छन् । ग्रीसमा यस प्रकारको यति ठूलो आगलागीको घटना पहिलो पटक भएको उल्लेख गरिएको छ ।
