काठमाडौँ, पाकिस्तानको पेशावर शहरमा स्थित बलिउडका दुई हस्ती दिलीप कुमार र राज कपूरको पुख्र्यौली घरलाई सङ्ग्रहालयमा रूपान्तरण गर्ने ऐतिहासिक योजना सुरु गरिएको छ ।
यस योजनाअन्तर्गत यी दुई भवनको संरक्षण र पुनः निर्माणको कार्य प्रारम्भ गरिएको हो । यी घरहरु करिब सय वर्ष पुराना हुन् ।
यी भवनहरूमा बलिउडका दिग्गज अभिनेता दिलीप कुमार र राज कपूरको बाल्यकाल बितेको थियो । यी घरहरुलाई सन् २०१४ मा पाकिस्तानका तत्कालीन प्रधानमन्त्री नवाज शरीफले ‘राष्ट्रिय सम्पदा’ को रूपमा घोषणा गरेका थिए ।
यस अभियानमा विश्व बैंकको आंशिक आर्थिक सहयोग समेत रहेको छ । पुनः निर्माण कार्यको कुल लागत ७ करोड पाकिस्तानी रुपैयाँ लाग्ने अनुमान गरिएको छ ।
सङ्ग्रहालयमा दिलीप कुमार र राज कपूरको बाल्यकाल, पारिवारिक पृष्ठभूमि, चलचित्र क्षेत्रमा प्रवेश, अभिनय यात्रा, तस्बिर, भिडियो, र वस्तुहरू प्रदर्शनीमा राखिनेछ ।
यस पुनः निर्माण अभियानले भारत र पाकिस्तानबीचको साझा सांस्कृतिक सम्बन्धलाई उजागर गर्नेछ ।
