बुटवलमा विद्युत् प्रसारण लाइनको चार खुट्टा भएको टावर हटाएर मोनोपोल अर्थात् एउटा मात्रै खुट्टा भएको टावर राख्ने काम थालिएको छ ।
बुटवल उपमहानगरपालिका–११ कालिकापथको योगिकुटी चोकदेखि होराइजन चोकसम्मको सडक खण्डमा पर्ने प्रसारण लाइनको मोनोपोल राख्ने काम भइरहेको हो । झन्डै एक किलोमिटर सडक खण्डको बीचमा रहेका चारवटा टावरलाई हटाएर राखिने मोनोपोलको जग (फाउण्डेसन) निर्माण भइरहेको छ । फाउण्डेसनको काम १५ दिनभित्रमा सकिने छ । यो सडक खण्डमा ३०÷३० मिटरका दुईवटा र ३२÷३२ मिटरका दुईवटा मोनोपोल जडान गरिने छ । प्रसारण लाइनलाई झन्डै १५ दिन बन्द अर्थात् (सटडाउन) गरेर मोनोपोल जडान गरिने छ । पुरानो टावरलाई हटाइने छ ।
साथै, तार पनि नयाँ प्रयोग गरिनेछ । नेपाल विद्युत् प्राधिकरणका कार्यकारी निर्देशक कुलमान घिसिङले निर्माणस्थलको अनुगमन गरी गर्मी शुरु हुनुभन्दा पहिले नै मोनोपोल जडान गरिसक्न आग्रह गरेका छन् ।
