काठमाडौं, लामो समयसम्म निरन्तर बढिरहेको तरकारीको मूल्य अहिले भने घट्न थालेको छ । कहिले विषादी परीक्षण त कहिले बाढी पहिरोका कारण तरकारीको भाउ उकालो लागिरहेको थियो । जसका कारणले गर्दा आम उपभोक्ता महङिको मारमा परेका थिए ।
कालिमाटी फलफूल तथा तरकारी बजार विकास समितिले दिएको जानकारी अनुसार पछिल्लो समय भने तरकारीको मूल्य घट्न थालेको छ । बुधबार को तुलनामा बिहीबार तरकारीको थोक मूल्य घटेको छ ।
कालिमाटी फलफूल तथा तरकारी बजार विकास समितिका बजार व्यवस्थापन अधिकृत मनोज धितालले प्राकृतिक प्रकोपका कारण केही समय तयारी आयात नै कम भएर मूल्य बढेको बताए । केही दिनयता भने मागअनुरुप नै तरकारी आयात भएकाले क्रमशः तरकारीको मूल्य घट्ने क्रममा रहेको उनको भनाइ छ ।
आउनै लागेका चाडपर्वमा पनि तरकारीको मूल्य नबढ्ने धितालको दाबी छ । कालिमाटी तरकारी बजारमा भारत तथा नेपालका विभिन्न जिल्लाबाट दैनिक करिब ८ सय टन तरकारी आयात हुदै आएको छ ।
